Sa taglamig, tumataas ang gana sa pagkain at bumababa ang aktibidad ng katawan, kaya’t marami ang tumataba lalo na sa panahon ng Lunar New Year kung saan kaliwa’t kanan ang kainan. Ngunit ayon sa mga nutrisyonista, ang taglamig ay isang gintong pagkakataon para sa epektibong pagbabawas ng timbang. Dahil mas mabilis ang metabolismo ng katawan sa malamig na panahon, ang pagbawas ng timbang ay mas madali—nakakatulong ito hindi lang sa pagpigil ng taba kundi pati na rin sa pagpapabilis ng pagsunog ng calories.
Ayon kay Nutrisyonista Hsu Tzu-Ya, may tatlong pangunahing dahilan kung bakit madaling tumaba sa taglamig:
Bumababa ang pisikal na aktibidad, kaya mas kaunting enerhiya ang nagagamit.
Ang malamig na panahon ay nagpapataas ng metabolismo, na nagreresulta sa pagtaas ng gana sa pagkain.
Mas makapal at maluluwag ang mga damit sa taglamig, kaya hindi agad napapansin ang pagbabago sa katawan.
Ngunit sa kabila nito, ang taglamig din ang pinakamabisang panahon upang magbawas ng timbang. Ayon kay Nutrisyonista Wu Yue-Tzu, ang mas mahabang gabi sa taglamig ay nagdaragdag ng melatonin, na tumutulong sa cholesterol metabolism at paggamit ng glucose. Samantala, ang malamig na temperatura ay nag-aaktibo ng brown fat, isang uri ng taba na tumutulong sa pagsunog ng glucose at iba pang taba upang lumikha ng init sa katawan. Dahil sa prosesong ito, tumataas ang metabolic rate ng katawan.
Sinabi ni Wu:
"Karaniwan nating naririnig na sa malamig na panahon, tumataas ang ating basal metabolic rate, kaya mas maraming enerhiya ang nasusunog. Kapag isinama ito sa tamang pagkain at tamang kontrol ng diyeta, mas magiging epektibo at mas maayos ang proseso ng pagbabawas ng timbang."