Ayon sa ulat ng AFP, habang nahaharap ang TikTok sa banta ng agarang pagbabawal sa Amerika, maraming content creators sa bansa ang lumilipat sa isa pang Chinese social media app.
Ang Xiaohongshu, o mas kilala bilang "Red Note" sa Ingles, ay isang platform na may kombinasyon ng disenyo mula sa Instagram at Pinterest. Sa dami ng mga gumagamit na dumagsa dito, pumalo ang Xiaohongshu sa unang pwesto ng pinaka-madaling i-download na app sa Apple App Store noong Enero 13.
Ang influencer na si Jen Hamilton, na may 3.9 milyong followers sa TikTok, ay pabirong nagkomento sa isang video na nag-aanunsyo ng kanyang paglipat: “Oh, ayaw ninyong ibigay sa China ang ating napakasensitibong personal na impormasyon?”
Noong nakaraang taon, ipinasa ng gobyerno ng Amerika ang batas na “kung hindi ibebenta, ipagbabawal” upang pilitin ang ByteDance, ang Chinese parent company ng TikTok, na ibenta ang platform o harapin ang pagbabawal nito sa Amerika. Magiging epektibo ang batas na ito sa Enero 19.
Bagama’t kinukundena ng mga kritiko ang batas na ito bilang isang hakbang na lumalabag sa kalayaan sa pagpapahayag, iginiit ng gobyerno ng Amerika na pinapayagan umano ng TikTok ang China na kolektahin ang datos, manmanan ang mga gumagamit, at gamitin ito para sa propaganda. Mariing itinanggi ng China at ByteDance ang mga alegasyong ito.
Sa kabila ng mga kontrobersiya, tulad ni Hamilton, marami ang hindi nababahala. Sa kanyang video, sinabi niyang wala siyang pakialam kung makuha ng China ang kanyang personal na impormasyon.
Nagbahagi pa siya ng biro kung saan may gumagamit umano ng kanilang social security number bilang username upang “mas mapabilis ang promosyon ng mga espiya.”
Hinimok din niya ang iba pang mga “TikTok refugees” na sumama sa kanya at sinabi, “Halika na!”
Kahit na halos lahat ng nilalaman sa Xiaohongshu ay nasa wikang Chinese, hindi ito naging hadlang sa mga curious na Amerikano.
Sa kasalukuyan, mayroong humigit-kumulang 170 milyong TikTok users sa Amerika.