Sinusuri na ngayon ng National Taiwan University at National Tsinghua University ang napakalaking dami ng data na nakuha mula sa Dark Energy Spectroscopic Instrument (DESI), isang instrumento na nakakasukat sa epekto ng dark energy sa paglawak ng universe. Inihayag ni Propesor Lan Ting-wen (藍鼎文) ng NTU na ang kanilang koponan ay gumagawa ng mga bagong paraan ng pagproseso ng data gamit ang mga bagong teknolohiya at artificial intelligence or AI.
Ang DESI ay isang siyentipikong instrumento sa pananaliksik na pinatatakbo ng Lawrence Berkeley National Laboratory upang magsagawa ng spectrographic survey ng malalayong galaxy. Ang instrumento ay nagbibigay-daan sa mga astronomers na suriin ang kasaysayan ng pagpapalawak ng universe at ang mahiwagang pisika ng madilim na enerhiya. Nasa 2,100 m ang DESI sa tuktok ng Kitt Peak sa Sonoran Desert malapit sa Tucson, Arizona sa US.
Pagsapit ng 2025, ang proyekto ng DESI ay hindi lamang magsusuri ng dark energy kundi magsusuri din ng higit sa 40 milyong mga bagay, kabilang ang mga bituin, malalayong galaxy, at napakalaking black hole na natuklasan sa unang bahagi ng universe. Inaasahang gagawa ito ng pinakamalaking three-dimensional na mapa ng universe sa kasaysayan, na nagpapahintulot sa mga astronomers na mas mahusay na tuklasin ang likas na katangian ng madilim na enerhiya.
Natutuwa si Propesor Lan na ang isang institusyong pananaliksik sa Taiwan ay maaaring lumahok sa isang internasyonal na proyekto tulad ng DESI. Sinabi niya na ito ay nagpapakita na mayroong maraming mga posibilidad na magagawa para sa Taiwan dahil sa mga mahuhusay na propesyonal nito. Pinasalamatan din ni Lan ang Ministri ng Edukasyon, ang National Science Council, at ang dalawang unibersidad sa pagsuporta sa partisipasyon ng mga estudyante at mananaliksik, at pag-aalaga sa susunod na henerasyon ng mga astronomers ng Taiwan.