Isang malagim na insidente ang naganap nung araw (Hunyo 13) bandang 5:03 ng hapon sa campus ng Feng Chia University, kung saan tumumba ang isang puno sa tabi ng kalsada at nagdulot ng pagkamatay at pagkasugat ng mga estudyante. Ayon sa pamunuan ng unibersidad, sila ay lubos na nalulungkot at nagdadalamhati sa trahedya, at agad na nagsagawa ng masusing inspeksyon sa lahat ng matataas na punongkahoy sa campus upang palakasin ang pamamahala sa kaligtasan ng kapaligiran.
Sa inilabas na pahayag ng unibersidad, dalawang estudyante ang dumaraan sa lugar ng insidente nang biglang tumumba ang isang punong banyan na tinatayang 60 taong gulang. Isa sa kanila, isang lalaking estudyante, ang naipit sa ilalim ng punongkahoy. Agad na ipinatupad ng pamunuan ang emergency response protocol at tumawag sa 119 para sa agarang tulong. Mabilis na rumesponde ang mga bumbero at medikal na grupo sa lugar. Gumamit sila ng makinang pamutol upang alisin ang puno at naialis ang biktima bandang 5:28 ng hapon, at agad dinala sa ospital.
Gayunman, hindi na siya naisalba at binawian ng buhay. Ayon sa unibersidad, kaagad na tinawagan ang pamilya ng nasabing estudyante, at nakarating sila sa ospital sa tulong ng mga school security personnel. Lubos ang pakikiramay at pasakit ng buong unibersidad, at nangakong magbibigay ng lahat ng kinakailangang tulong at suporta sa pamilya ng biktima. Buong komunidad ng paaralan ay nagpapahayag ng taos-pusong pakikiramay sa pagkawala ng isang mahalagang buhay.
Samantala, ang isang babaeng estudyante naman ay nagtamo lamang ng bahagyang galos, at isinugod din sa ospital para sa pagsusuri at obserbasyon. Ayon sa paaralan, bibigyan siya ng suporta, pangangalaga, at psychological counseling ng opisina ng student affairs.
Dagdag pa ng unibersidad, patuloy ang kanilang pakikipag-ugnayan sa pamilya at pagtutok sa pangangailangan ng mga estudyante. Isinagawa na rin ang komprehensibong pagsisiyasat sa lahat ng punongkahoy sa campus upang matiyak ang kaligtasan at maiwasan ang pag-ulit ng ganitong trahedya. Nangako rin ang Feng Chia University na makikipagtulungan nang buo sa mga awtoridad para sa imbestigasyon ng insidente.