Taipei, Taiwan — June 16, 2024 — Ang sikat na mang-aawit at aktres na si Julie Anne San Jose ay nagbigay-pugay sa mga Overseas Filipino Workers (OFW) sa pagdiriwang ng 126th Philippine Independence Day at Migrant Workers Day na ginanap sa Taipei noong Hunyo 12, 2024. Sa harap ng libu-libong Pilipino, nagpahayag siya ng kanyang pasasalamat at pagbati.
Sa aming panayam sa kanya, ibinahagi ni Julie Anne ang kanyang personal na koneksyon sa komunidad ng mga OFW sa Taiwan. "Ang aking ama ay naging OFW rin dito sa Taiwan bilang isang engineer noong unang panahon. Kaya't malapit sa puso ko ang pagkakataong ito na makasama kayo at maipadama ang aking suporta."
Nagpasalamat din si Julie Anne sa mainit na pagtanggap ng Filipino community sa kanya, lalo na't ito ang unang beses niyang pagpunta sa Taiwan. "Lubos ang aking pasasalamat sa inyong lahat sa napakainit na pagtanggap. Napakahalaga ng inyong mga sakripisyo at dedikasyon sa inyong mga pamilya at sa ating bayan. Nakakatuwang makita kung gaano kalaki ang nagagawa ninyo para sa ating ekonomiya at sa inyong mga mahal sa buhay."
Bukod sa kanyang talumpati, nag-alay din si Julie Anne ng mga awitin na nagpataas ng diwa ng pagdiriwang. Ang kanyang makulay na pagtatanghal ay nagbigay saya at inspirasyon sa mga dumalo.
Sa huli, binigyang-diin ni Julie Anne ang kahalagahan ng pagkakaisa at suporta para sa isa't isa. "Sa bawat tagumpay at pagsubok, lagi nating tandaan na iisa lamang ang ating pinagmulan. Magkaisa tayo at patuloy na magtulungan. Ang tagumpay ng bawat isa sa atin ay tagumpay ng ating buong bayan."
Ang pagdiriwang ng 126th Philippine Independence Day at Migrant Workers Day ay naglalayong kilalanin at parangalan ang mga sakripisyo at kontribusyon ng mga Pilipinong manggagawa sa ibang bansa. Sa mga katulad ni Julie Anne San Jose, patuloy nilang pinapadama ang pagmamahal at suporta sa mga kababayan nating patuloy na nag-aalay ng kanilang buhay para sa kinabukasan ng kanilang mga pamilya at ng bansa.