Inimbitahan ng Mental Health Association sa Taiwan (MHAT) ang mga kinatawan mula sa industriya, gobyerno, at akademya sa isang roundtable meeting noong Martes. Binibigyang-diin ng mga eksperto sa pagpupulong na ang kalusugan sa isip sa lugar ng trabaho ay isang karapatang pantao at ang paglikha ng mga pambansang patakaran na sumusuporta sa kalusugan sa isip ay dapat maging pangunahing prayoridad.
Tumanggap ng higit na atensyon ang mga isyu sa kalusugan sa isip sa mga nakaraang taon, kapwa sa Taiwan at sa buong mundo. Ayon sa WHO, isa sa bawat walong tao sa mundo ang nakaranas ng sakit sa isip noong 2019, kung saan ang pagkabahala at depresyon ang pinaka-karaniwang mga karamdaman. Ang pandemya ng COVID-19 noong 2020 ay nagdulot ng 26% at 28% na pagtaas sa mga karamdaman na ito.
Sinabi ni Professor Chen Ruey-Yu ng Taipei Medical University na ang iskor ng Taiwan sa 2023 Asia Mental Health Index ay nasa ibaba ng median at pang-6 ito sa 12 Asian countries na itinuring na mataas ang stress. Natuklasan din sa survey na tumaas ang oras ng trabaho simula nang maganap ang pandemya, at isang-kapat ng mga empleyado ang tumatanggap ng mga gawain sa negosyo pagkatapos ng oras ng trabaho na pinipili pa rin nilang asikasuhin.
Naniniwala si Chen na dapat isama ng gobyerno ang kalusugan sa lahat ng patakaran, dahil ang pagpapromote ng kalusugan ang pinaka-epektibo at mababang gastos na paraan para sa pag-iwas sa sakit at mga karamdaman, na may average return on investment na 2.2. Inirekomenda niya ang pagtatatag ng isang sustainable at komprehensibong plano para sa pagpapromote ng pisikal at mental na kalusugan.
Idinagdag ni Li Po-han, associate professor sa Institute of Health Behaviors and Community Science ng National Taiwan University, na ang pagpapabuti ng kalusugan sa isip sa lugar ng trabaho ay hindi lamang lumilikha ng mas matibay na workforce, kundi nakatutugon din sa mga obligasyon ng bansa sa karapatang pantao.