Tungkol sa posibilidad ng pagbubukas ng serbisyo para sa mga dayuhang manggagawa, sinabi ni Premier Cho Jung-tai nuong (ika-11 ng Disyembre) na hindi maaaring ipagwalang-bahala ng gobyerno ang problema ng kakulangan ng trabahador sa industriya, ngunit kailangang makamit ang balanse sa karapatan ng mga manggagawa. Binigyang-diin ni Cho na inatasan niya ang bagong Ministro ng Paggawa, si Hung Shen-han, na maglatag ng komprehensibong polisiya ukol sa paggawa. Idinagdag niya na ang pagbibigay-prioridad sa lokal na manggagawa ay isang palagiang prinsipyo, at hindi ito dapat pagdudahan ng sinuman.
Noong ika-10 ng Disyembre, nakipagpulong si Premier Cho sa General Chamber of Commerce of the Republic of China (ROCCOC). Ayon kay Xu Shu-bo, tagapangulo ng ROCCOC, ipinangako ng Ministry of Labor sa pulong na papayagan, sa ilang partikular na kundisyon, ang pagkuha ng mga dayuhang manggagawa sa sektor ng serbisyo.
Sa isang panayam noong ika-11, sinabi ni Premier Cho na ang kakulangan ng trabahador ay isang karaniwang problema sa mga industriya sa bansa na hindi maaaring balewalain ng gobyerno. Gayunpaman, binanggit niyang patuloy na itinaas ng gobyerno ang minimum na sahod sa loob ng maraming taon upang tiyakin ang proteksyon sa mga pangunahing karapatan ng mga manggagawa. Aniya, kailangang makamit ang balanse sa pagitan ng pagtugon sa kakulangan ng trabahador at pangangalaga sa mga manggagawa.
Dagdag pa ni Premier Cho, maglalaan siya ng mas maraming oras upang makipag-usap sa mga grupo ng manggagawa. Naniniwala siyang ang ganitong uri ng komunikasyon ay makatutulong sa paglikha ng mas maayos na kapaligiran sa trabaho, gayundin sa pagsulong ng industriya at ekonomiya ng bansa.