Ang media ay isang mahalagang panangga sa pangangalaga ng demokrasya, pagkakaiba-iba, at kalayaan sa pagpapahayag! Sa harap ng laganap na pekeng balita at digmaang pang-impormasyon, napakahalaga para sa media na manatili sa mga prinsipyo ng tamang pamamahayag, panatilihin ang pagiging patas, at tiyakin ang transparency.
Ang Radio Taiwan International (Rti), isang pundasyong pampubliko na kumakatawan sa Taiwan sa pandaigdigang plataporma gamit ang 20 wika, ay opisyal na nakapasa sa sertipikasyon ng "Journalism Trust Initiative" (JTI) na inilunsad ng Reporters Without Borders (RSF) noong Enero 29, 2024. Ito ang kauna-unahang pagkakataon na ang isang media outlet sa Taiwan at sa buong mundo ng wikang Mandarin ay nakatanggap ng ganitong pagkilala. Pinatunayan nito ang matibay na paninindigan ng Rti sa pagiging propesyonal at mapagkakatiwalaan sa larangan ng pamamahayag.
Ang Reporters Without Borders (RSF), isang pandaigdigang organisasyon na nagtataguyod ng kalayaan sa pamamahayag, ay inilunsad ang Journalism Trust Initiative (JTI) noong 2019 at inanyayahan ang media sa buong mundo na lumahok. Upang makamit ang JTI certification, kailangang sumunod ang isang media outlet sa tatlong mahahalagang proseso:
- Magsagawa ng self-assessment gamit ang JTI questionnaire, na binubuo ng 18 kategorya at 130 pamantayan, kabilang ang transparency sa pagmamay-ari, pinagmulan ng pondo, editorial policies, pananagutan, fact-checking, at pagsasanay ng mga kawani.
- I-publish ang kanilang Transparency Report upang ipakita ang kanilang integridad sa publiko.
- Sumailalim sa masusing pagsusuri at pag-audit mula sa isang independiyenteng third-party bago tuluyang makuha ang opisyal na sertipikasyon.
Ayon kay Lai Hsiu-Ru, chairman ng Rti, nang malaman nila ang proyektong ito, agad nilang naunawaan ang kahalagahan nito at nagpasya silang maging unang media outlet sa Taiwan na lumahok. Bagama’t masalimuot at mahigpit ang proseso, matagumpay nilang natapos ang lahat ng kinakailangang pag-audit at napatunayang isang malusog, propesyonal, at mapagkakatiwalaang media organization ang Rti.
Binigyang-diin ni Lai Hsiu-Ru na ang sertipikasyong ito ay hindi lamang nagpapatunay ng pagiging bahagi ng Rti sa pandaigdigang media community, kundi nagpapakita rin ng kakayahan ng Taiwan na makipagsabayan sa internasyonal na pamamahayag. Dagdag pa rito, sumasalamin ito sa suporta ng Rti sa mga organisasyong pandaigdig tulad ng RSF, na tumutulong sa pagpapalaganap ng mahahalagang impormasyon sa buong mundo.
Sa pagtatapos, inalala rin ni Lai ang dating RSF Secretary-General na si Christophe Deloire, na malapit nilang nakatrabaho sa proyektong ito bago siya pumanaw dahil sa matinding karamdaman. Ayon kay Lai, ang JTI Journalism Trust Initiative ay isa sa pinakamahalagang legasiya na naiwan ni Deloire sa mundo. Ipinahayag niya ang kanyang taos-pusong pasasalamat sa pagkakataong maging bahagi ng JTI, na isang malaking hakbang hindi lamang sa pagkilala sa Rti kundi pati na rin sa patuloy na pagsulong ng de-kalidad at mapagkakatiwalaang pamamahayag.