Ipinapanukala ng Ministry of Labor ang pagpapaluwag ng alituntunin upang payagan ang mga overseas Chinese at dayuhang estudyante na makapasok sa anim na uri ng mid-level technical work, kabilang na rito ang pagiging cargo driver. Sa kasalukuyan, walang itinakdang language requirement para sa trabahong ito. Ayon sa Ministry of Labor, kailangang magkaroon ng professional driver’s license ang mga nais maging cargo driver, kaya’t kinakailangan din na may kakayahang bumasa ng Mandarin. Ngunit para sa kakayahan sa pagsasalita ng Mandarin, ito ay kailangang pag-usapan pa kasama ang Ministry of Transportation.
Ayon kay Su Yu-Guo, pinuno ng Division for Transnational Labor Management ng Workforce Development Agency, ang magiging pasya kung isasama ba ang kakayahan sa Mandarin bilang kwalipikasyon para sa cargo drivers ay pagdedesisyunan kasabay ng konsultasyon sa Ministry of Transportation.
Ipinaliwanag ni Su na sa naging talakayan ng mga ahensya, nagkaroon ng mungkahi na kailangan ng language requirements para sa mga mid-level na passenger vehicle drivers, personnel ng safety management, at mga hospital assistants. Inaasahang idaragdag ang mga ito sa pormal na anunsyo. Para sa passenger transport, dahil ito ay direktang nagbibigay serbisyo sa mga tao, naging mas mahalaga ang language skills sa diskusyon.
Tungkol naman sa cargo transport, sinabi ni Su na may dalawang aspeto ang isasaalang-alang. Una, kailangan ng professional driver's license upang makapagmaneho ng cargo vehicle, at bahagi ng proseso ng pagkuha ng lisensyang ito ang pagpasa sa mga pagsusulit tungkol sa road safety, na itinuturing na mahalagang technical qualification—kaya’t kinakailangan ang kakayahang bumasa ng Mandarin. Samantala, kung isasama ba ang kakayahan sa pagsasalita ng Mandarin bilang kwalipikasyon, ito ay pag-uusapan pa sa pakikipagpulong sa Ministry of Transportation.